Ntroduzioni

Salutamu!
Pi prima cosa v’ha diri ca i palori di puisì scritti ccà
Nun zunnu comu l’attruvati scritti ne libbra,
picchì ccà haiu scrittu i palori comu vennu prununziati ri sishiliani.

Ora jo nun zacciu socch’ è bonu e giustu . . .
- Si scriviri i palori comu sunnu ne libbra e leggili a la sishiliana.
- O scriviri i palori a la “fonetica sishiliana”.

Ohè!
Nun aviti a pinzari ca iu vogghiu curreggiri soccu i pueti scrissiru,
Ma sulu “leggiri a la sishiliana” soccu scrissiru i pueti.

Fashiti viautri!
E fashitimi sapiri.

Li Surci

Un zurciteddhu ri testa sbintata
avia pigghiatu la via ri l`ashitu
e fashìa na vita scialacquata
cu l`amishuna ri lu so partitu.

Lu ziu shircau tirarlu a bona strata,
ma zappau all`acqua pirchì era attrivítu
e di chiù la saimi avia liccata
di taverni e di zàgati peritu.

Finarmenti Mushiddha fishi luca,
iddhu grida: Ziu!-Ziu! cu dogghia interna;
sò ziu pri lu rammaricu si suca;

poi rishi: "Lu to casu mi custerna,
ma ora mi sherchi? chiaccu chi t`affuca!
Scutta pi quannu isti a la taverna!"

La vucca

Ssi capiddhi e biunni trizzi
sù ghiardini ri biddhizzi,
cussì vaghi, cussì rari,
chi li pari nun ci sù.

Ma la vucca cu li fini
soi rintuzzi alabastrini,
trizzi d’oru, chi abbagghiati,
pirdunati, è beddha chiù:

Nun lu negu, amati gigghia,
siti beddhi a meravigghia;
siti beddhi a signu tali
chi l’uguali nun ci sù.

Ma la vucca nzuccarata
cuannu parra, cuannu shiata,
gigghia beddhi, gigghia amati,
pirdunati, è beddha chiù.

Occhi, in vui fa pompa Amuri
di l’immenzu so valuri,
vostri moti, vostri sguardi
shiammi e dardi r’iddhu sù.

Ma la vucca, quannu rushi
s’ apri, e modula la vushi,
occhi… Ah vui mi taliati!…
Pirdunati, ’un parru chiù.

Ssi capiddi e biundi trizzi
sù jardini di biddizzi,
cussì vaghi, cussì rari,
chi li pari nun ci sù.

Ma la vucca cu li fini
so' dintuzzi alabastrini,
trizzi d’oru, chi abbagghiati,
perdonati, è bedda chiù.

Nun lu negu, amati gigghia,
siti beddi a meravigghia;
siti beddi a signu tali
chi l’uguali nun ci sù.

Ma la vucca ‘nzuccarata
quannu parra, quannu ciata,
gigghia beddi, gigghia amati,
perdonati, è bedda chiù.

Occhi, in vui fa pompa Amuri
di l’immensu so valuri,
vostri moti, vostri sguardi
ciammi e dardi d’iddu sù.

Ma la vucca, quannu duci
s’apri, e modula la vuci,
occhi... Ah vui mi taliati!...
Pirdunati, ‘un parru chiù.