 |
Puisia ru nonnu |
 |
 |
|
 |
|
|
A me verra (1915 - '18)
Amish' e parenti vi vogghiu cuntari
1
Tutti li suffirenzi me' verrieri
Ora vi cuntu cu palori chiari
chiddhu ca suffrii nta quattr' anni ri peni.
scusati si sbagliassi a lu parlari,
s' 'un m' accumpagna giustu lu pinzeri.
Chi nfernu, chi fastidiu, chi sfirnìshi
chi scuppiau o novishentuquinnishi.
E vintiquattru ri Majiu 'na jurnata,
2
jornu di la mobilitazioni,
l' Austria hav' a verra dichiarata
cu la ran bannera triculuri.
Ognunu rispunnemu a la chiamata
Tutti r' un zenzu, ‘n attu r' un valuri.
Ni chiama a classi a classi a li so' mprisi
nenti sapennu ca si perd' i spisi.
P' ognunu chi lassamu lu paisi
3
Cu li famigghi tutti affrittulusi,
e massimamente quarche burgisi
chi lassau all' abbannunu li so chiusi,
scuppiau sta ran forti crisi
puru pi li famigghi chiù cunfusi.
Senza chi nuddhu ri vui s' affinnirìa
nominu sulu la famigghia mia.
Spartimi ra famigghia 'un mi vulia,
4
a mmia mi parsi un gran trarimentu
sei misi avia ch' era pi casa mia
ci avia arrivatu pi sforzu e pi stentu
s' iddhu l' avia rittu un ci criria
d' essiri trattatu ri stu senzu
stu valantomu ven' a cerc' a mmia
mentri iu a iddhu nun lu penzu.
Ogni putenti voli fari verra.
5
Armanu tutti, juvini e nchiffarati,
cu cummatti pi mari, cui pi terra
senza aviri di nui nuddha pietati.
Sù com' un mastrurascia cu la serra
chi tagghia tutti i rossi e li minuti,
armanu puru pi fari la verra
tutti li zoppi, shunchi, orvi e muti.
Rishinu iddhi ch' è nishissitatati
6
A fannu puru i figghi ri papà.
Iddhi si la virino nte teatri
e a niautri nni la fannu fari ccà.
Tutti li so strumenti su' accurdati
ch' ognunu r'iddhi a mbuscari si va
e a niautri scarsi tutti armati
ni runan' ‘i mazza senza pietà.
Chistu riscursu lassamulu ccà.
7
Vi cuntu un pocu di la vita mia
fashennu lu surdatu nta shittà.
Quantu autri partìri viria,
e s'iddhu ven' a mmia comu si fa?
E mentri la me menti lu rishia
m' arriva l' ordini di partiri dhà
a lu settantashincu fanteria.
E vintishincu ri giugnu si partia,
8
lassamu la shittà di jorn' e 'n gnornu,
a sorti chi ni port' a la stranìa
jò speru chi ni sarva lu ritornu.
Mentri lu trenu tagghia la via
pinzava sempri la notti e lu jornu,
pinzava sempri a la famigghia mia,
e pashinunavia, quetu e sonnu.
E vintishincu arrivamu di jornu,
9
scinnemu di lu trenu a Cirvignanu,
un trummitteri sunau lu cornu
a lu cumannu di lu capitanu.
Sparanu li cannuna r' iddhi ‘ntornu,
dunanu allarmi pi 'n aeroplanu;
mi misi 'n culaturi pi ssu jornu
chi c' era di lavari peri e manu.
A Cirvignanu fishimu riposu
10
E subbitu armamu accampamentu,
avìamu un cumannanti mafiusu
chi vulia fari tuttu non momentu,
ma era 'na patata schifiusa,
a notti si sintiu bummardamentu
iddhu si ntisi veniri u nirvusu
e partiri vulia comu lu ventu.
Eramu quasi shincushentu
11
Tutti a campu apertu chi chiuvia
nta trona e lampi, acqua e forti ventu
ognunu la so tenna si fashia.
Era un puntu ri cuncentramentu,
cui pi 'na strata cui pi nautra via
partiri viria 'nu reggimentu
tutti curaggiusi com' a mmia.
L' ordini di partìri u nnumani vinia
12
Đitti pi lu front' ‘i Monfalconi
zainu a spaddha e si ncumincia la via
a peri caminamu pi sei uri,
mentri bummardari si sintia
la ranni città di Monfalcuni,
e niautri tanti poveri surdati
ni nni jìamu a lu mashellu cunnannati.
Junti chi fomu appena na dhu nfernu
13
Unn vi lu pozzu riri chi virìa
na dha ran forti lotta e dhu shimentu
quantu cumpagni carìri viria,
tutti ni sparpagghiamu nton momentu
s' iddhu l'avia rittu un ci criria
chissu fu 'nu veru spaventu
crirennuni chi dhocu ni tinia.
A li shincu r' Austu si rishia
14
r' iri a dari l'assaltu a lu tammuru,
un tirantunnu chi é, gir' e firria,
tuttu ntunniatu ri sacchett' a muru.
Un cannuni di la cumpagnia
S' avanza pi l' assaltu e spara puru.
M' arresta pi ricordu ssa sirata
Na cannunata si lu porta 'n fumu.
D' Austu scinnemu a lu vintunu
15
E pi furtuna turnamu a ripusari
U nimicu attacca arré u tammuru,
Eramu tutti cu cori rimossu.
A nostr' artiglieria chi spara puru
Contr' o nimicu chi stava a riddossu.
E nui partemu e arrivamu di notti
nton paisi chiamatu Tri Sordi.
E vintinovi r' Austu si rishia
16
di partiri pu front' ‘i San Micheli
u nnumani partìri s' avia
pi ghiri a passari autri peni
mentri mi fannu fari n' autra via
chi fashia veniri lu friddu e la frevi,
mi portanu a lu fronti Santa Lushia
unni chi mi piscaru nta li peri.
O vintinovi eramu 'n trinceri
17
s' avia ncuminciatu l'avanzata,
ni taliavamu tutti nta li sheri:
'sa comu ni finisci sta jurnata'.
Mentri l' austriashi artiglieri
cuntinuavanu la so sparata
na nica scheggia mi firisci un peri,
scappu ri dha vita dispirata.
Ssa vita l' amu fattu chiù ri unu
18
e nni fa a tutti troppu mprissioni,
mangiatu ri pirocchi e stari nuru
ognunu suppurtari chiù nun moli.
Diciotto misi passai, fora r' ognunu,
n mezzu dhu focu ùnni chi si mori
e cull' aiutu di Gesù e Maria,
arrivai nautra ota 'n casa mia.
Ssennu a lishenza, ch' era 'n casa mia,
19
un gnornu sentu leggiri u giurnali,
c' era 'na scrittura chi dishia
'ai nostri ci toccava rincolare'.
quasi nuddhu veru ci criria,
vintottu misi sempri r' avanzari,
tutti li beni Cadorna ch' avia
n tempu sei jorna ci l' appi a lassari.
Comu si spiega ora amishi cari
20
Ch' è; successu stu putenti dannu?
Jornu e notti sempri r' avanzari
Pigghiari lu tirrenu parmu a parmu
N' mezz' a dhi vòscura, muntagni e ciumari
quantu me frati morti ci stannu,
e a nui ni li tocca abbannunari
senza sapiri r' unni veni u dannu.
Sintennu chissu, Signuri vi nghannu,
21
Nun zacciu s' aiu fattu quarch' erruri,
passannu tutti sti peni e st' affannu,
allura m'aiu datu disirturi.
Va beni pi la patria è un dannu,
ma avennu a la famigghia tantu amuri,
e la fortuna amentri mi rishia,
'Si vvoi campari t' ha pigghiari ssa via'.
E vintitri ri Marzu la matina
22
di l'annu novishenturishiottu
pinzava a la famigghia cu gran stima
dubitannu di farici un tortu,
avia la me casa pi catina
chi mi tirava senzu a stari accortu,
m'arrestanu a li reshi ri matina
tannu lu cori meu si ntisi mortu.
Si prisintaru a li sò maneri,
23
mi puntanu u fishili ri vishinu
du' sbirrazzi brutti crudeli
vennu a arristari a mmia e a mme cushinu.
Rishiottu misi passai, fora r' ognunu,
n mezzu dhu focu unni chi si mori
pinzannu a la famigghia, e dha jurnata
mi purtaru a caserma ra Baddhata.
Stesimu dhà rintra 'na nuttata,
24
pi 'n Trapani partemu lu nnumani
mi spartu ra famigghia dha jurnata
pinzava sempri chi vulia scappari,
taliava ch' era forti ncatinatu
era vardatu di tri grossi cani,
penzu 'sarà ch' è lu me distino'
mentri ncumincia lu caminu.
Fashennu dha vita sempri ri cuntinuu
25
n Trapani arrivamu a mezzujornu,
un brigaderi ch' era un sbirru finu,
ch' era cuntintuni pi dhu jornu,
sutt' occhi tinia a mme cushinu
e a mmia mi firriava sempri ntornu
e Vanni 'u zoppu' cu la so fracata
ni purtau a caserma ra Mocata.
Junti chi fomu pi dha jurnata
26
ni pigghia u nomi nautru brigaderi
paria ch' avia 'na mala livata
ni pigghiau a tutti propriu ri beni
vulia cuntata tutta la passata:
'Vi prisintastu cu li vostri peri?'
Jò ci arrispunnii cu curtisia:
'S' 'un era capitatu 'un ci vinia'.
Ora vi cuntu senza buggia
27
quantu amishi truvai na dhi cuntorni
Cu me cushinu, era 'n cumpagnia
di quarantotto, mi paria un gnornu,
ma penzu sempri a la famigghia mia
pashi nun mi po' quetu e sonnu,
ora vi parlu cu la viritati
com' eramu sirvuti e rispettati.
Eramu nchiusi rintr'e cammarati
28
cuntannu sempri a nostra vittoria,
pi ranciu ni passavano patati
e quarche ghiornu baccalà e cicoria.
Eramu propriu boni sistimati
pi fari rinfriscari la memoria,
e ss' a famigghia nun porta manciari
avemu beddhi cosi ri cuntari.
Quaranta jorna vittimu passari,
29
a li reshi di Majiu vinni l'ura
prestu lu trenu ni fannu pigghiari
accompagnati ri tri tartaruna
e pi 'm Palermu ni fannu avviari
rishennu a niautri 'traritura'
e arrivannu poi a la stazzioni
ni portanu dhittu a l' Ucciardoni.
Ni nchiurinu dhà rintr' on cammaruni,
30
ni rispettanu di principi e di conti.
'Na vardia carciarera lazzaruna,
ch' era niputi di Giuseppi Fonti,
appena arrivati a stu signuri
ni fa "ora partiti pi lu fronti".
Jò ci arrispunnii "un zacciu la via,
si voli vegnu appressu ri vossia."
Stesimu quattru jorna 'n cumpagnia
31
ni rispittava comu veru frati
pi biviri ni porta acqua ri liscia
pi mangiari pani ri patati
pigghiannu cunfirenza ni rishia
"vi portanu a viautri a villabbati,
nton gnardineddhu firriatu ri mura
nzemmula cu l'autri disirtura"
Partemu scuraggiati lu nnumani
32
ncatinati comu dù briganti
a tutti ci pariamu piatusi
a chiddhi chi taliavanu ri distanti,
ma poi virennu ch' eramu surdati
curaggiu ni fashianu tutti quanti
rishianu ognunu "unn vi scantati,
vi portanu cu l' autri a Villabbati".
Junti chi fomu appena nta stu locu
33
paria un cunmmentu ri monaci cumpletu
stavamu tutti sempri 'n mezz' on focu
picchì era rintra 'na fossa fabbricatu.
Un' aria brutta e poi manciari pocu
ognunu carìa subbitu malatu
addisiàvamu ci vinissi un motu
a dhu carogna chi nni ci avia purtatu.
E pi gustari megghiu lu palatu
34
avìanu nautru bruttu naturali
ogni sbirruni cu lu nervu armatu
chi nni trattava peggiu di l'armali
senz' avillu ri nuddhu cumannatu
fashianu sempri lu nervu schiuccari,
eramu rintr' on curtigghiu cumminati
chi nuddhu putia fora scappari.
Mentri tutti stavanu a pinzari
35
a stu nfernu chi nn' avia arrivatu,
e cu' sherca mezzi pi scappari
p' 'un essiri chiù malu trattatu,
mentri arriva ordini a sti nfami
di stu ripartu essiri sgummiratu,
mi portanu a Milazzu lu nnumani
unni chi la gran fami amu pruvatu.
Furtuna chi ti vogghiu a lu me latu
36
fammi curaggiu e dunami aiutu
mi trovu intra Milazzu cunnannatu
scarsu, mortu ri fami arriddushutu.
quarch' amicu ch' avia a lu me latu
prova la so parti e ssi sta mutu.
Tutti sti beni u guvernu m' ha datu
pi ricumpenza dopo tantu aiutu.
Passannu sti jurnati ri miseria
37
stàvamu tutti cu la menti 'n aria
tiniamu li facci ri materia,
pariamu tutti chini di malaria,
pi travagghiari scupremu l' america
cucchiari e gavetti jittavamu all' aria
e poi ogni tantu si fashia 'na prerica
contru dhi sbirruna e a dha nfamia.
Dhà rintra paria 'n arsinali,
38
ognunu si fashia lu so misteri,
cu vinni ficu, pira, puma e pani
ca cu' cumprava ci sintia u sapuri,
cu joca a carti sempri pi dinari
cu allorda carta pi stampari shuri
cu fa lu camurrista pi fumari
senza nuddha vivrogna né russuri.
Cu mme cushinu stava tutti l' uri
39
passamu 'n tempu sta vita ri cani.
Un gniornu fu chiamatu run sbirruni,
l' avvisu ci vinia ru tribbunali
lu portanu 'm Palermu all' Ucciarduni
prestu ni spartinu u nnumani.
La sorti ni destina lu stratuni
e l' avviniri ch' avemu a passari.
Jò dopu pocu jorna fui chiamatu
40
all' ottu di Novembri la matina,
veni un brigaderi e un zurdatu
mi rishi "ora parti pi Messina,
di lu tribbunali sì avvisatu,
Cà li manu ca c' è la catina".
M' attaccanu pun meru cunnannatu,
Nun mi la scordu chiù chissa matina.
Subbitu partemu pi Messina,
41
mi portanu ravanti a li giurenti
eranu fursi chiù ri 'na vintina
avvucati, giurati, presidenti,
prestu lu me proshessu si ncamina,
la me cunnanna la tinianu a menti,
pi tteniri firmizza e disciplina
mi runanu a suspisi anni venti.
Lassamu tribunali e prisirenti
42
dopu sei jorna ni portanu a lu fronti,
abituatu ri dhi ranni spaventi
ch' ogni minutu chiamava li santi,
arrivavu dhà ch' 'un c' era chiù nenti,
firmaru l' armistiziu sull'istanti.
Ma penzu a la cunnanna e su' scuntenti,
penzu a mogghi, figghi e tutti quanti.
Mi passu anticchia 'i tempu cu stu scantu
43
senza aviri fattu nuddhu mali.
Lu ministru di la verra Diaz Armandu
un gnornu pubblicau 'na shircolari,
sennu niautri tutti o so cumannu
ordini aviamu tutti r' ascutari
lu scrittu mi ralligrau 'n autru tantu
tutta la cunnanna mia fa annullari.
Ringraziu a Cristu e la surti, suvrani
44
ca m' assissteru sempri a tutti l'uri
a scornu ri carogna e di li nfami,
e di la genti farsa e traritura,
passu quattru anni ri focu e di fami
senza cogghiri sanghu né calura.
Ma speru nta poch' 'i jorna 'i cuncidarimi
quantu vaiu a vasari la me shura.
Fiori ca di mia si sempri amata
45
dopu quattr' anni ti trovi rifiorita,
ora ch' è arrivata la jurnata
jetta ssa fogghia trista e sculurita,
ha avutu curpa la furtuna ngrata
soffriri tantu nni la nostra vita
ma speru nta la Matri Addulurata
di riturnari cu saluti e vita.
Ora chi sta gran lotta è tirminata
46
tornanu 'n cori l' amuri e la vita
torna la vita vecchia addimurata
torna la paci bella rifiorita,
mi resta pi ricordu ssa jurnata,
cu' appi la furtuna di villa finita,
e tutta la quadruplici alliata
gridau "Viva l' Italia unita!"
M' aiu 'mpignatu e arrivai stancu
47
pi cuntarivi tutta l' evangelica,
a farimi sti versi nun fu francu,
vulia la menti d' un struitu mericu,
scrivu giustu la me firma e quasi mancu
vulia passari quarche libbru tecnicu,
u nomi meu vi ricu chiaru e francu
è Amodeo Giuseppi di Domenicu.
|
|
|
 |
|
 |
|