Na ota a Missina ci fu na matrhi chi avia un figghiu di
nomi Cola. Stu carusu stava tuttu lu jornu a mari, e sso
matrhi a bushiari:
- Cola! Cola! Veni n terra ma ti pari chi ssi pisci? - E
iddhu a natari sempri chiu' luntanu, ch' a povira matrhi
si dannava a taliallu.
Un jornu era tantu avviluta e stanka di ushiari e dispirarisi, chi
cci mannau na malidizioni:
- Cola! Aiss' a ddivintari veru un pisci!
Ssu jornu i porti ru shelu avian' a essiri aperti, picchi' a
malirizioni di corpu s'avvirau, e iddhu si ntisi veru
com' un pisci. Ci cariu ri n kori ogni affettu pi kiddhi ri n terra, e ssi rapiu nmeshi
pi kiddhi ch'
eranu a mari. E dhà arristau.
Ne notti ascutava i respiri e i risati ri ninfi marini cull' occhi
beddhi com' e stiddhi. Jia appressu e sireni ch' u corpu
com' i derfini, e cci sciddhicavanu ri n mezz' e vrazza.
N funn' o mari, stava nkantatu ar ascutari i so canti n
mezzu e jardina di curallu e l'accumpagnava ne saluna di
cristallu unn' abbitavanu e abballavanu.
Addivintau forti e beddhu, e natava com' un pisci. I piscatura u
canuscianu e u chiamavanu Colapisci. E a so fama si
spanniu pi tutta l' isula ra Sishilia.
A vushi ch' a mari c' era n' omu ch paria un pisci, arrivau finu o
re Federicu, chi urdinau a tutt' i marinara di riricci,
cuannu u virianu, chi u re ci vulia parlari.
Un jornu un piscaturi, jennu o largu ca varca, s' u vitti natari
vishinu.
- Cola! - ci rissi - c' è u re a Missina chi voli viriri
comu nati, e havi cosi r'addumannariti!
Cola si prisintau e fu arrishivutu ru re, chi cci rissi:
- Cola Pisci, tu chi ssi accussi' bravu a natari aviss'
a fari u giru di tutta l' isula ra Sishilia, e dirimi unn
'è ca u mari è chiu' funnutu, e soccu si viri!
Colapisci ubbidiu e ssi misi a natari n tunnu a Sishilia.
Cuannu turnau u re ci addumannau socc' avia vistu. E iddhu rissi
ch' avia vistu muntagni, vaddhuna e caverni, e tutti
cosi posati suprà a trhi culonni, una sutta a ogni punta
ra sishilia:
- Ma sutta Missina mi scantai picchi' u funnu unn zi
viri.-
O re ci vinni un pinzeri ch' unn ci rava pashi. Vulia sapiri soccu
c' era sutta, e unni s' appuiava Missina. - Ha ghiri dha
sutta a taliari, e mmi rishi soccu viri.-
Cun tuttu chi si scantava Colapisci si fishi curaggiu: - Maistà,
vitti soccu vitti e mmi scantu, ma ubbidisciu a
vussignoria.- E ssi jittau.
Mankau un jornu, e cuannu turnau a galla era pallidu e scantatu
mortu. - Soccu viristi, Cola? - Ci addumannau u re.
- Sugnu scantatu mortu picchi' sutta Missina vitti na
culonna chi è ciaccata. Ri n funnu acchiana accua
nmiscata cu fumu. Scinnivi, scinnivi, ma u funnu unn u
vitti.-
O re ci vinni na prioccupazioni, e vulia sapiri soccu c'
era sutta sta punta ra Sishilia. - No, Maistà, dhocu unn
mi jettu chiu', mi scantu.- Unn arriniscennu a kummincilu, u re si livau a curuna ch' avia n testa,
tutta fatta r' oru e brillanti, e a jittau a mari.
- Cola, va pigghiala!
- Ma chi fishi, Maistà! A curuna ru regnu!
- Curuna, ch' unn ci nn' è nautrha o munnu.- Rissi
u re. - Cola, l' ha ghiri a pigghiari!
- S' accussi' voli vussignuria, scinnu n funnu a
pigghialla, ma u cori mi rishi ch' unn acchianu chiù. - E
ssi jittau.
Cola pisci arristau n funn' o mari e unn acchianau chiù.
N miritati iddhu unn' è mortu. Successi chi, mentrhi scinnia
sempri chiu' n funnu, s'addunau ch' a culonna Piloru,
chiddha sutta Missina, chi già era tutta shaccata, si
staia rumpennu pezza pezza, e subbitu l' agguantau e ci
misi a spaddha sutta p' unn fari affunnari a Sishilia. E
accussi' arristau n funnu a mari a teniri ch' a spaddha
a culonna di capu Piloru.
S' hav' a sapiri chi cuannu c' è terremotu vishinu o
strhettu, è picchi' Colapisci, stanku di teniri a punta
ra Sishilia sempri cu na spaddha, si passa a culonna
nall' autrha spaddha, e chissu crea un muvimentu, chi a
genti supra a terra ci pari terremotu.
